കൊച്ചി: പരമ്പരാഗത ഓണാഘോഷങ്ങൾക്ക് പുതുമയുടെ നിറം പകർന്നുകൊണ്ട് 3,000 മുണ്ടുകൾ ഉപയോഗിച്ച് ഒരുക്കിയ ഭീമൻ ‘മുണ്ടുകളം’ ഏഷ്യാ ബുക്ക് ഓഫ് റെക്കോർഡ്സിൽ ഇടംനേടി. ലോകത്ത് തന്നെ ആദ്യമായി മുണ്ടുകൾ ഉപയോഗിച്ച് ഒരുക്കിയ ഈ വേറിട്ട പുക്കളത്തിന് ‘Largest Pookkalam Display Created Using Dhotis’ എന്ന വിഭാഗത്തിലാണ് റെക്കോർഡ് അംഗീകാരം ലഭിച്ചത്.

കൊച്ചി ഫോറം മാളിലാണ് ഈ വിസ്മയകരമായ കലാസൃഷ്ടി ഒരുക്കിയത്. ഏകദേശം 32 അടി വ്യാസമുള്ള മുണ്ടുകളമാണ് സന്ദർശകരുടെ ശ്രദ്ധ നേടിയത്. വിവിധ നിറങ്ങളിലുള്ള മുണ്ടുകൾ കൃത്യമായ അളവിലും അനുപാതത്തിലും ക്രമീകരിച്ചാണ് പരമ്പരാഗത പുക്കളത്തിന്റെ മാതൃകയിൽ ഈ ഭീമൻ കലാസൃഷ്ടി രൂപപ്പെടുത്തിയത്.

ഓണാഘോഷത്തിന് വേറിട്ടൊരു കലാസ്പർശം

പൂക്കൾക്ക് പകരം മുണ്ടുകളെ കലയുടെ ഭാഗമാക്കി മാറ്റിയതാണ് മുണ്ടുകളത്തിന്റെ ഏറ്റവും വലിയ പ്രത്യേകത. കേരളത്തിന്റെ പരമ്പരാഗത വസ്ത്രസംസ്കാരത്തെയും ഓണത്തിന്റെ ആഘോഷഭാവത്തെയും ഒരുമിപ്പിച്ചാണ് ഈ ആശയം അവതരിപ്പിച്ചത്.

പ്രമുഖ വസ്ത്ര ബ്രാൻഡായ റാംരാജ് (Ramraj) ആണ് പരിപാടി സംഘടിപ്പിച്ചത്. ഇവന്റിന്റെ പ്രോഗ്രാം കോർഡിനേഷൻ ബ്ലൂ ബെൽ കമ്മ്യൂണിക്കേഷൻസ് (Blue Bell Communications) നിർവഹിച്ചു.

അനിൽ ചുണ്ടേലിന്റെ വ്യത്യസ്ത ആശയം

സിനിമാ മേഖലയിലെ വി.എഫ്.എക്സ് ഡയറക്ടറും പ്രശസ്ത ത്രെഡ് ആർട്ടിസ്റ്റുമായ അനിൽ ചുണ്ടേൽ ആണ് മുണ്ടുകളത്തിന് പിന്നിലെ ആശയശിൽപി. വ്യത്യസ്തമായ കലാപരീക്ഷണങ്ങളിലൂടെ ശ്രദ്ധ നേടിയിട്ടുള്ള അദ്ദേഹത്തിന്റെ പുതിയ ആശയമാണ് മുണ്ടുകളമായി കൊച്ചി ഫോറം മാളിൽ രൂപംകൊണ്ടത്.

ലോകത്തിലെ ആദ്യത്തെ ട്രാൻസ്പരന്റ് ത്രെഡ് ആർട്ട് (Transparent Thread Art) സൃഷ്ടിച്ച് ശ്രദ്ധേയനായ കലാകാരൻ കൂടിയാണ് അനിൽ ചുണ്ടേൽ. സാങ്കേതികവിദ്യയും കലയും പരമ്പരാഗത ആശയങ്ങളും കൂട്ടിച്ചേർത്ത് വ്യത്യസ്തമായ സൃഷ്ടികൾ അവതരിപ്പിക്കുന്നതിൽ അദ്ദേഹം ശ്രദ്ധേയനാണ്.

വയനാട്ടിലെ വാർത്തകൾ തൽസമയം അറിയാൻ വാട്സ്ആപ്പ് ചാനലിൽ ജോയിൻ ചെയ്യു

റെക്കോർഡ് നേട്ടത്തോടെ ഓണാഘോഷം

കേരളത്തിന്റെ തനത് വസ്ത്രമായ മുണ്ടിനെ കേന്ദ്രമാക്കി ഒരുക്കിയ ഭീമൻ മുണ്ടുകളത്തിന് റെക്കോർഡ് അംഗീകാരം ലഭിച്ചതോടെ ഓണാഘോഷത്തിന് മറ്റൊരു ചരിത്രനേട്ടം കൂടി സ്വന്തമായി. പാരമ്പര്യവും കലയും സർഗാത്മകതയും ഒരുമിച്ചുചേർന്ന ഈ വ്യത്യസ്ത സൃഷ്ടി കൊച്ചി ഫോറം മാളിലെത്തിയവർക്കും വേറിട്ട കാഴ്ചാനുഭവമാണ് സമ്മാനിച്ചത്.