രാജ്യത്തെ ബാങ്കിങ് സേവനങ്ങളെ ബാധിക്കുന്ന രീതിയിൽ ബാങ്ക് ജീവനക്കാരുടെ സംഘടനകൾ രാജ്യവ്യാപക പണിമുടക്കിന് ആഹ്വാനം ചെയ്തു. സെപ്റ്റംബർ 28 മുതൽ 30 വരെ മൂന്ന് ദിവസമാണ് യുണൈറ്റഡ് ഫോറം ഓഫ് ബാങ്ക് യൂണിയൻസ് (UFBU) പണിമുടക്ക് പ്രഖ്യാപിച്ചിരിക്കുന്നത്.
സെപ്റ്റംബർ 26 നാലാം ശനിയാഴ്ചയും സെപ്റ്റംബർ 27 ഞായറാഴ്ചയും ബാങ്കുകൾക്ക് സാധാരണ അവധിയായതിനാൽ, പണിമുടക്ക് കൂടി ചേരുമ്പോൾ സെപ്റ്റംബർ 26 മുതൽ 30 വരെ തുടർച്ചയായി അഞ്ച് ദിവസം ബാങ്കിങ് സേവനങ്ങളിൽ തടസ്സം നേരിടാൻ സാധ്യതയുണ്ട്.
ആഴ്ചയിൽ അഞ്ച് ദിവസത്തെ ജോലി സംവിധാനവും രണ്ട് ദിവസത്തെ അവധിയും ഉൾപ്പെടെയുള്ള വിവിധ ആവശ്യങ്ങൾ ഉന്നയിച്ചാണ് ബാങ്ക് ജീവനക്കാർ സമരത്തിലേക്ക് നീങ്ങുന്നത്. സമര ദിവസങ്ങളിൽ ബാങ്ക് ശാഖകളിലെ നേരിട്ടുള്ള സേവനങ്ങൾ പരിമിതപ്പെടാൻ സാധ്യതയുള്ളതിനാൽ ഉപഭോക്താക്കൾ ആവശ്യമായ ഇടപാടുകൾ മുൻകൂട്ടി പൂർത്തിയാക്കുന്നത് ഉചിതമായിരിക്കും.
വയനാട്ടിലെ വാർത്തകൾ തൽസമയം അറിയാൻ വാട്സ്ആപ്പ് ചാനലിൽ ജോയിൻ ചെയ്യു
എടിഎമ്മുകളിൽ പണലഭ്യത, ചെക്ക് ക്ലിയറൻസ്, ബാങ്ക് ശാഖകളിലെ മറ്റ് സേവനങ്ങൾ എന്നിവയെ സമരം ബാധിച്ചേക്കാം. ഡിജിറ്റൽ ബാങ്കിങ്, യുപിഐ തുടങ്ങിയ ഓൺലൈൻ സേവനങ്ങളുടെ പ്രവർത്തനം ബാങ്ക് അടിസ്ഥാനസൗകര്യങ്ങളും സാഹചര്യങ്ങളും അനുസരിച്ച് വ്യത്യാസപ്പെടാം.
നിലവിലെ സമര നടപടികൾക്ക് ശേഷവും ആവശ്യങ്ങൾ പരിഗണിക്കാത്ത പക്ഷം ഒക്ടോബർ 26 മുതൽ അനിശ്ചിതകാല പണിമുടക്ക് ആരംഭിക്കുമെന്ന് ബാങ്ക് യൂണിയനുകൾ നേരത്തെ അറിയിച്ചിട്ടുണ്ട്.
