സിഎംആർഎൽ–എക്സാലോജിക് ഇടപാടുമായി ബന്ധപ്പെട്ട് അഴിമതി നിരോധന നിയമപ്രകാരം പിണറായി വിജയനെതിരെ കേസ് എടുക്കണമെന്നാവശ്യപ്പെട്ട് എൻഫോഴ്സ്മെന്റ് ഡയറക്ടറേറ്റ് (ഇഡി) നൽകിയ കത്തിൽ നിയമപരിശോധന പൂർത്തിയാക്കിയ ശേഷം തീരുമാനമെടുക്കുമെന്ന് പ്രതിപക്ഷ നേതാവ് വിഡി സതീശൻ. വിഷയത്തിൽ രാഷ്ട്രീയ ഇടപെടലില്ലെന്നും നിയമപരിശോധന പൂർത്തിയായാൽ തീരുമാനം വൈകാതെ പ്രഖ്യാപിക്കുമെന്നും അദ്ദേഹം വാർത്താസമ്മേളനത്തിൽ പറഞ്ഞു.
രാഷ്ട്രീയ പാർട്ടികൾ കമ്പനികളിൽനിന്നും സ്ഥാപനങ്ങളിൽനിന്നും സംഭാവന സ്വീകരിക്കുന്നത് സാധാരണമായ കാര്യമാണ്. എന്നാൽ സിഎംആർഎൽ–എക്സാലോജിക് ഇടപാട് അതിൽനിന്ന് വ്യത്യസ്തമായ വിഷയമാണെന്നാണ് സതീശന്റെ നിലപാട്. ഇഡി നൽകിയ കത്തിൽ ഗൗരവമേറിയ നിരവധി കാര്യങ്ങൾ പരാമർശിച്ചിട്ടുണ്ടെന്നും അതിനൊപ്പം തെളിവുകളും കൈമാറിയിട്ടുണ്ടെന്നും അദ്ദേഹം പറഞ്ഞു.
കേന്ദ്ര ഏജൻസി ഉന്നയിച്ച ആരോപണങ്ങളുടെ ഗൗരവം കണക്കിലെടുത്ത് അവ നിയമപരമായി പരിശോധിക്കേണ്ടതുണ്ട്. ഇഡിയാണ് കത്ത് നൽകിയതെന്ന കാരണത്താൽ മാത്രം അത് പരിശോധിക്കാതെ തള്ളിക്കളയാൻ സർക്കാരിന് കഴിയുമോയെന്നും സതീശൻ ചോദിച്ചു.
സോണിയ ഗാന്ധിക്കും രാഹുൽ ഗാന്ധിക്കുമെതിരെ കേന്ദ്ര ഏജൻസികൾ അന്വേഷണം നടത്തിയപ്പോഴും കോൺഗ്രസ് നിയമപരമായാണ് അതിനെ നേരിട്ടതെന്ന് അദ്ദേഹം ചൂണ്ടിക്കാട്ടി. അന്വേഷണത്തിന്റെ ഭാഗമായി ഇരുവരും മണിക്കൂറുകളോളം ചോദ്യം ചെയ്യലിന് ഹാജരായിരുന്നുവെന്നും രാഹുൽ ഗാന്ധിയെ 55 മണിക്കൂറോളം ചോദ്യം ചെയ്തിരുന്നുവെന്നും സതീശൻ പറഞ്ഞു.
വയനാട്ടിലെ വാർത്തകൾ തൽസമയം അറിയാൻ വാട്സ്ആപ്പ് ചാനലിൽ ജോയിൻ ചെയ്യു
അന്വേഷണത്തിനെതിരെ രാഷ്ട്രീയമായി പ്രതികരിക്കേണ്ട സാഹചര്യമുണ്ടായപ്പോള് കോൺഗ്രസ് രാഷ്ട്രീയ നിലപാട് വ്യക്തമാക്കിയിട്ടുണ്ട്. എന്നാൽ അന്വേഷണവുമായി പൂർണമായി സഹകരിക്കുകയാണ് പാർട്ടി ചെയ്തതെന്നും സതീശൻ പറഞ്ഞു. അതിനാൽ തന്നെ ഇഡി നൽകിയ കത്തിലെ കാര്യങ്ങളിൽ നിയമപരമായ പരിശോധന നടത്തുന്നതിൽ രാഷ്ട്രീയം കാണേണ്ടതില്ലെന്നും അദ്ദേഹം വ്യക്തമാക്കി.
