കൊവിഡ് മഹാമാരിയുടെ വലിയ തരംഗങ്ങൾ അവസാനിച്ചതിന് നാല് വർഷങ്ങൾക്കുശേഷം ആന്ധ്രപ്രദേശിൽ വീണ്ടും കൊവിഡ് മരണങ്ങളും പുതിയ രോഗബാധകളും റിപ്പോർട്ട് ചെയ്തിരിക്കുന്നത് ആരോഗ്യവകുപ്പിനെ ജാഗ്രതയിലാക്കിയിരിക്കുകയാണ്. കഴിഞ്ഞ മൂന്ന് ആഴ്ചയ്ക്കിടെ സംസ്ഥാനത്ത് നാല് കൊവിഡ് മരണങ്ങൾ സ്ഥിരീകരിച്ചതായും ജൂൺ 26 മുതൽ ജൂലൈ 16 വരെ 12 പേർക്ക് രോഗബാധ കണ്ടെത്തിയതായും ആരോഗ്യവകുപ്പ് അറിയിച്ചു.

മരണപ്പെട്ടവരിൽ മൂന്ന് പേർ രായലസീമ മേഖലയിലെ കടപ്പ സ്വദേശികളാണ്. നാലാമത്തെ മരണം കാക്കിനാഡ സ്വദേശിയുടേതാണ്. മരിച്ച എല്ലാവർക്കും പ്രമേഹം, ഉയർന്ന രക്തസമ്മർദ്ദം, വൃക്കരോഗം തുടങ്ങിയ ഗുരുതരമായ മറ്റ് ആരോഗ്യപ്രശ്നങ്ങൾ ഉണ്ടായിരുന്നുവെന്ന് ആരോഗ്യ കുടുംബക്ഷേമ വകുപ്പ് സെക്രട്ടറി ജി. വീരപാണ്ഡ്യൻ വ്യക്തമാക്കി. കടപ്പ സ്വദേശികളിൽ ഒരാൾ ചികിത്സയിലിരിക്കെ തമിഴ്നാട്ടിലെ വെല്ലൂർ ക്രിസ്ത്യൻ മെഡിക്കൽ കോളേജിൽ വെച്ചാണ് മരിച്ചത്.

നിലവിൽ രോഗബാധിതരിൽ നിന്ന് ശേഖരിച്ച സാമ്പിളുകൾ വൈറസിന്റെ വകഭേദം തിരിച്ചറിയുന്നതിനായി പൂനെയിലെ നാഷണൽ ഇൻസ്റ്റിറ്റ്യൂട്ട് ഓഫ് വൈറോളജിയിലേക്ക് (NIV) ജനിതക ശ്രേണീകരണ പരിശോധനയ്ക്ക് അയച്ചിട്ടുണ്ട്. പുതിയ കേസുകളിൽ എട്ട് എണ്ണം കടപ്പ ജില്ലയിലും രണ്ട് എണ്ണം ഗുണ്ടൂരിലും ഓരോ കേസ് വീതം വിശാഖപട്ടണത്തും കാക്കിനാഡയിലുമാണ് റിപ്പോർട്ട് ചെയ്തത്.

രോഗബാധിതർ വിവിധ പ്രദേശങ്ങളിൽ നിന്നുള്ളവരായതിനാൽ നിലവിൽ സമൂഹവ്യാപനത്തിന്റെ സൂചനകളില്ലെന്ന് ആരോഗ്യവകുപ്പ് വ്യക്തമാക്കി. രോഗികളിൽ ചിലർ വീടുകളിലും ആശുപത്രികളിലും നിരീക്ഷണത്തിലായിരിക്കുമ്പോൾ മറ്റുചിലർ രോഗമുക്തരായി ആശുപത്രി വിട്ടിട്ടുണ്ട്.

സംസ്ഥാനത്ത് ആശങ്കപ്പെടേണ്ട സാഹചര്യമില്ലെന്നും എന്നാൽ മുൻകരുതൽ നടപടികൾ തുടരണമെന്നും ആരോഗ്യവകുപ്പ് നിർദേശിച്ചു. പൊതുസ്ഥലങ്ങളിൽ മാസ്ക് ധരിക്കുക, തിരക്കേറിയ ഇടങ്ങൾ പരമാവധി ഒഴിവാക്കുക, രോഗലക്ഷണങ്ങൾ കണ്ടാൽ ഉടൻ പരിശോധന നടത്തുക തുടങ്ങിയ നിർദേശങ്ങളും നൽകിയിട്ടുണ്ട്.

ഇതിനിടെ, ജൂലൈ ഒന്നിന് ശേഷം രാജ്യത്താകെ റിപ്പോർട്ട് ചെയ്ത 360 കൊവിഡ് കേസുകളിൽ ഏറ്റവും കൂടുതൽ കേരളത്തിലാണ്. കർണാടക, മഹാരാഷ്ട്ര, തമിഴ്നാട്, ഡൽഹി, രാജസ്ഥാൻ, അന്തമാൻ-നിക്കോബാർ ദ്വീപുകൾ എന്നിവിടങ്ങളിലും പുതിയ രോഗബാധകൾ സ്ഥിരീകരിച്ചിട്ടുണ്ട്.

വയനാട്ടിലെ വാർത്തകൾ തൽസമയം അറിയാൻ വാട്സ്ആപ്പ് ഗ്രൂപ്പിൽ ജോയിൻ ചെയ്യുക

കർണാടകയിൽ അതിർത്തി പരിശോധന കർശനമാക്കി

ആന്ധ്രപ്രദേശിലെ പുതിയ കൊവിഡ് സാഹചര്യത്തെ തുടർന്ന് കർണാടക സർക്കാർ അതിർത്തി മേഖലകളിൽ ജാഗ്രത ശക്തമാക്കി. ആന്ധ്രയുമായി ബന്ധമുള്ള എട്ട് അതിർത്തി ചെക്ക്പോസ്റ്റുകളിൽ പരിശോധന ആരംഭിച്ചിട്ടുണ്ട്. ജൂലൈ മാസത്തിൽ മാത്രം സംസ്ഥാനത്ത് 32 കൊവിഡ് കേസുകൾ റിപ്പോർട്ട് ചെയ്തതായി അധികൃതർ അറിയിച്ചു. ഇത് കഴിഞ്ഞ മാസത്തെ അപേക്ഷിച്ച് ഇരട്ടിയിലേറെയാണ്. കൂടാതെ ഇൻഫ്ലുവൻസ-എ, എച്ച്1എൻ1 പനി കേസുകളിലും വർധനവ് രേഖപ്പെടുത്തിയിട്ടുണ്ടെന്ന് ആരോഗ്യവകുപ്പ് അറിയിച്ചു.