പിടികിട്ടാപ്പുള്ളി സുകുമാരക്കുറുപ്പ് ജീവിച്ചിരിപ്പുണ്ടെന്ന തരത്തിൽ പുറത്തുവന്ന പുതിയ റിപ്പോർട്ടിൽ സ്ഥിരീകരണമില്ലെന്ന് കേരള പൊലീസ്. മറ്റൊരു രാജ്യത്ത് പേരും തിരിച്ചറിയൽ വിവരങ്ങളും മാറ്റി സുകുമാരക്കുറുപ്പ് കഴിയുന്നുണ്ടെന്ന അവകാശവാദത്തോടെയാണ് പുതിയ വാർത്തകൾ പുറത്തുവന്നത്. എന്നാൽ റിപ്പോർട്ടിൽ പറയുന്ന വ്യക്തി സുകുമാരക്കുറുപ്പ് തന്നെയാണെന്ന് തെളിയിക്കുന്ന ഔദ്യോഗിക തെളിവുകളൊന്നും നിലവിൽ ലഭിച്ചിട്ടില്ലെന്നാണ് പൊലീസിന്റെ നിലപാട്.

42 വർഷത്തോളമായി തുടരുന്ന സുകുമാരക്കുറുപ്പ് കേസിൽ അന്വേഷണം അവസാനിപ്പിച്ച് റിപ്പോർട്ട് ക്രൈംബ്രാഞ്ച് മേധാവിക്ക് കൈമാറാനുള്ള നടപടികൾ പുരോഗമിക്കുന്നതിനിടെയാണ് പുതിയ വിവരങ്ങൾ പുറത്തുവന്നത്. ബ്രൂണെയിൽ രൂപമാറ്റം വരുത്തി സുകുമാരക്കുറുപ്പ് ജീവിക്കുന്നുവെന്നാണ് റിപ്പോർട്ടിലെ പ്രധാന അവകാശവാദം.

എന്നാൽ പുറത്തുവന്ന ചിത്രത്തിലുള്ളത് തൃശൂർ സ്വദേശിയായ ഒരാളാണെന്ന സൂചനകളും ഉയർന്നിട്ടുണ്ട്. ഇക്കാര്യം പൊലീസ് പരിശോധിച്ചേക്കും. 1984ൽ കേസ് രജിസ്റ്റർ ചെയ്തതുമുതൽ സുകുമാരക്കുറുപ്പിനെക്കുറിച്ച് നിരവധി അഭ്യൂഹങ്ങൾ പ്രചരിച്ചിട്ടുണ്ട്. സമീപകാലത്തും വിവിധ സ്ഥലങ്ങളിൽ സുകുമാരക്കുറുപ്പിനെ കണ്ടെന്ന അവകാശവാദങ്ങൾ ഉയർന്നിരുന്നെങ്കിലും ക്രൈംബ്രാഞ്ച് നടത്തിയ പരിശോധനകളിൽ അവ സ്ഥിരീകരിക്കാനുള്ള തെളിവുകൾ കണ്ടെത്താനായിരുന്നില്ല.

ബ്രൂണെയിൽ താമസിക്കുന്നതായി പറയുന്ന വയോധികന്റെ 2023ലെ ചിത്രമാണ് ഇപ്പോൾ ചർച്ചയായിരിക്കുന്നത്. പേരും തിരിച്ചറിയൽ വിവരങ്ങളും മാറ്റി ബ്രൂണെയിലെ ഇന്ത്യൻ സമൂഹത്തിൽ നിന്നും മലയാളികളിൽ നിന്നും അകന്ന് ഒറ്റപ്പെട്ടാണ് ഇയാൾ കഴിയുന്നതെന്നാണ് റിപ്പോർട്ടിൽ പറയുന്നത്. സുകുമാരക്കുറുപ്പിനോട് സാമ്യമുള്ള വ്യക്തിയെ കണ്ടെത്തിയത് ഒരു സൈബർ വിദഗ്ധൻ നടത്തിയ അന്വേഷണത്തിലൂടെയാണെന്നും റിപ്പോർട്ടുകളുണ്ട്.

സുകുമാരക്കുറുപ്പിന്റെ പഴയ ചിത്രങ്ങൾ അടിസ്ഥാനമാക്കി എഐ സാങ്കേതികവിദ്യ ഉപയോഗിച്ച് തയ്യാറാക്കിയ നിരവധി സാധ്യതാ ചിത്രങ്ങൾ പരിശോധിച്ച ശേഷമാണ് ബ്രൂണെയിലുള്ള വ്യക്തിയിലേക്ക് അന്വേഷണം എത്തിയതെന്നാണ് അവകാശവാദം. ഇയാൾ താമസിക്കുന്ന വീടും ഭക്ഷണം കഴിക്കാനെത്തുന്ന ഹോട്ടലും കണ്ടെത്തിയതായും റിപ്പോർട്ടിൽ പറയുന്നു. ബ്രൂണെയിലെ മലയാളികളുടെ സഹായത്തോടെയാണ് വ്യക്തിയുടെ താമസസ്ഥലത്തേക്ക് എത്താൻ കഴിഞ്ഞതെന്നും അവകാശപ്പെടുന്നു.

1984ലെ ചാക്കോ വധക്കേസ്

1984ലാണ് ഗോപാലകൃഷ്ണക്കുറുപ്പ് എന്ന സുകുമാരക്കുറുപ്പ് ഇൻഷുറൻസ് തുക തട്ടിയെടുക്കുന്നതിനായി ചാക്കോ എന്നയാളെ കൊലപ്പെടുത്തിയ ശേഷം ഒളിവിൽ പോയത്. പതിറ്റാണ്ടുകളായി കേരള പൊലീസ് അന്വേഷിക്കുന്ന കേസിൽ ഇന്റർപോളിന്റെ സഹായത്തോടെയും അന്വേഷണം നടന്നിട്ടുണ്ട്.

1984 മുതൽ 1996 വരെ കേരള പൊലീസ് രാജ്യത്തിന്റെ വിവിധ ഭാഗങ്ങളിൽ വ്യാപകമായി തിരച്ചിൽ നടത്തി. മുംബൈ, ഡൽഹി, ബിഹാർ, മധ്യപ്രദേശിലെ ഹോഷംഗാബാദ് തുടങ്ങി നിരവധി സ്ഥലങ്ങളിൽ സുകുമാരക്കുറുപ്പ് വ്യാജ പേരുകളിലും വേഷമാറ്റങ്ങളിലുമായി കഴിഞ്ഞിരുന്നതായി പൊലീസിന് വിവരങ്ങൾ ലഭിച്ചിരുന്നു.

*വയനാട്ടിലെ വാർത്തകൾ തൽസമയം അറിയാൻ വാട്സ്ആപ്പ് ഗ്രൂപ്പിൽ ജോയിൻ ചെയ്യുക*

1990ൽ മുംബൈയിലെ സാന്താക്രൂസ് വിമാനത്താവളത്തിന് സമീപം ‘ജോഷി’ എന്ന പേരിൽ ഒരാൾ താമസിച്ചിരുന്നതായും പൊലീസ് രേഖകളിലുണ്ട്. അന്ന് നടത്തിയ മെഡിക്കൽ പരിശോധനയിൽ ഇയാൾക്ക് ഹൃദയസംബന്ധമായ പ്രശ്നങ്ങളുണ്ടായിരുന്നുവെന്നും ഒളിവിൽ കഴിയുന്ന സാഹചര്യത്തിൽ ദീർഘകാലം ജീവിച്ചിരിക്കാനുള്ള സാധ്യത കുറവാണെന്നും ഡോക്ടർമാർ വിലയിരുത്തിയിരുന്നു.

കൊൽക്കത്തയിലെ ഒരു ആശുപത്രിയിൽ സുകുമാരക്കുറുപ്പിനെ കണ്ടതായി അവിടെ നഴ്സായി ജോലി ചെയ്തിരുന്ന ആലപ്പുഴ സ്വദേശിനി രത്നമ്മ പൊലീസിന് മൊഴി നൽകിയിരുന്നു. എന്നാൽ പൊലീസ് സ്ഥലത്തെത്തുന്നതിന് മുമ്പ് ഇയാൾ അവിടെനിന്ന് രക്ഷപ്പെട്ടതായി അന്വേഷണ രേഖകൾ പറയുന്നു.

പുതിയ അവകാശവാദത്തിൽ ഇനി അന്വേഷണം ഉണ്ടാകുമോ?

സുകുമാരക്കുറുപ്പ് ജീവനോടെയില്ലെന്ന നിഗമനത്തിലേക്ക് അന്വേഷണം നീങ്ങുകയും 42 വർഷം നീണ്ട തിരച്ചിൽ അവസാനിപ്പിക്കാനുള്ള നടപടികൾ പൊലീസ് സ്വീകരിക്കുകയും ചെയ്യുന്നതിനിടെയാണ് ബ്രൂണെയുമായി ബന്ധപ്പെട്ട പുതിയ അവകാശവാദം പുറത്തുവന്നത്. എന്നാൽ ചിത്രത്തിലുള്ള വ്യക്തി സുകുമാരക്കുറുപ്പ് തന്നെയാണെന്ന് സ്ഥിരീകരിക്കാത്ത സാഹചര്യത്തിൽ പുതിയ റിപ്പോർട്ടിനെ ഔദ്യോഗിക സത്യമായി കാണാനാകില്ല.

ബ്രൂണെയിൽ കണ്ടെത്തിയതായി പറയുന്ന വ്യക്തിയുടെ തിരിച്ചറിയൽ സംബന്ധിച്ച വിവരങ്ങളും ചിത്രങ്ങളും പരിശോധിച്ച ശേഷമേ സംഭവത്തിൽ കൂടുതൽ വ്യക്തത ലഭിക്കൂ. പുതിയ അവകാശവാദം ശരിയാണോ എന്നത് പൊലീസ് അന്വേഷണത്തിലൂടെയും ലഭിക്കുന്ന തെളിവുകളിലൂടെയും മാത്രമേ സ്ഥിരീകരിക്കാനാകൂ.