ഇടുക്കി: മുല്ലപ്പെരിയാർ അണക്കെട്ടിലെ സുരക്ഷാ പരിശോധനയ്ക്ക് ആധുനിക സാങ്കേതിക സംവിധാനങ്ങൾ ഉപയോഗിക്കുന്ന കാര്യം പരിഗണിക്കാമെന്ന് വിദഗ്ധ സമിതി. സുരക്ഷാ പരിശോധന കൂടുതൽ സമഗ്രമാക്കണമെന്ന കേരളത്തിന്റെ ആവർത്തിച്ചുള്ള ആവശ്യത്തെ തുടർന്നാണ് സമിതിയുടെ നിലപാട്. ഒരു ദിവസം മാത്രം പരിശോധന നടത്തി റിപ്പോർട്ട് തയ്യാറാക്കുന്നതിലെ ആശങ്കയും കേരളം സമിതിയെ അറിയിച്ചിരുന്നു.
അണക്കെട്ടിന്റെ പ്രളയസുരക്ഷ, ഘടനാപരമായ സ്ഥിതി, ഭൂകമ്പ സാധ്യത, സീപ്പേജ് തുടങ്ങിയ വിഷയങ്ങളിൽ വിശദമായ പരിശോധന വേണമെന്നാണ് കേരളത്തിന്റെ ആവശ്യം. നേരത്തേ നടത്തിയ പഠനങ്ങളിലെ പോരായ്മകളും കേരളം സമിതിയുടെ ശ്രദ്ധയിൽപ്പെടുത്തി. ആവശ്യങ്ങൾ പരിഗണിച്ചില്ലെങ്കിൽ സുപ്രീംകോടതിയെ സമീപിക്കേണ്ടിവരുമെന്നും കേരളം നേരത്തെ വ്യക്തമാക്കിയിരുന്നു.
അണക്കെട്ടുമായി ബന്ധപ്പെട്ട് കേരളവും തമിഴ്നാടും ഉന്നയിക്കുന്ന ആശങ്കകളും ആവശ്യങ്ങളും വിശദമായി വിലയിരുത്തിയ ശേഷമായിരിക്കും വിദഗ്ധ സമിതി റിപ്പോർട്ട് തയ്യാറാക്കുക. സുപ്രീംകോടതി നിർദേശപ്രകാരം കേന്ദ്ര ഡാം സുരക്ഷാ അതോറിറ്റിയുടെ മേൽനോട്ടത്തിൽ രൂപീകരിച്ച അഞ്ചംഗ വിദഗ്ധ സമിതിയാണ് നിലവിലെ സുരക്ഷാ പരിശോധനകൾ നടത്തുന്നത്.
ഒരു ദിവസത്തെ പരിശോധനയ്ക്കിടെ പ്രധാന അണക്കെട്ട്, ബേബി ഡാം, സ്പിൽവേ, ഗാലറി തുടങ്ങിയ പ്രധാന ഭാഗങ്ങളിൽ സമിതി പരിശോധന നടത്തി. പരിശോധനയുടെ ഭാഗമായി അണക്കെട്ടിന്റെ നിലവിലെ സുരക്ഷാ സ്ഥിതിയും വിവിധ സാങ്കേതിക ഘടകങ്ങളും വിലയിരുത്തി.
ദേശീയ ജലവൈദ്യുത കോർപ്പറേഷൻ മുൻ ചെയർമാനും മാനേജിങ് ഡയറക്ടറുമായ ബലരാജ് ജോഷിയാണ് വിദഗ്ധ സമിതി അധ്യക്ഷൻ. ഒഡീഷ ജലവിഭവ വകുപ്പിലെ മുൻ എൻജിനീയറും കേരളത്തിന്റെ പ്രതിനിധിയുമായ ഇൻ ചീഫ് അശുതോഷ് ദാഷ് സമിതിയിലെ അംഗമാണ്.
വയനാട്ടിലെ വാർത്തകൾ തൽസമയം അറിയാൻ വാട്സ്ആപ്പ് ചാനലിൽ ജോയിൻ ചെയ്യു
കേരളം ഉന്നയിച്ചിരിക്കുന്ന സുരക്ഷാ ആശങ്കകൾ കൂടി പരിഗണിച്ച് പരിശോധനയുടെ പരിധിയും സാങ്കേതിക രീതികളും സംബന്ധിച്ച് സമിതി തുടർനടപടികൾ സ്വീകരിക്കുമെന്നാണ് പ്രതീക്ഷിക്കുന്നത്. പരിശോധനകൾ പൂർത്തിയാക്കിയ ശേഷം ഇരു സംസ്ഥാനങ്ങളുടെയും ആവശ്യങ്ങളും ആശങ്കകളും ഉൾപ്പെടുത്തി റിപ്പോർട്ട് തയ്യാറാക്കും.
