രാജ്യത്ത് ഒരാൾക്ക് കൈവശം വെക്കാവുന്ന സിം കാർഡുകളുടെ എണ്ണത്തിൽ കേന്ദ്രസർക്കാർ നിയന്ത്രണം ശക്തമാക്കുന്നു. നിലവിലുള്ള സിം പരിധി കർശനമായി നടപ്പാക്കുന്നതിന്റെ ഭാഗമായി പുതിയ കണക്ഷൻ അനുവദിക്കുന്നതിന് മുമ്പ് ഉപഭോക്താവിന്റെ പേരിലുള്ള സിം കാർഡുകളുടെ എണ്ണം പരിശോധിക്കാൻ ടെലികോം കമ്പനികൾക്ക് നിർദേശം നൽകിയിട്ടുണ്ട്.

ഓഗസ്റ്റ് 24 മുതൽ പുതിയ സംവിധാനം കൂടുതൽ കർശനമായി നടപ്പാക്കും. അനുവദനീയമായ പരിധിയിൽ കൂടുതൽ സിം കാർഡുകൾ നിലവിൽ ഉപയോഗിക്കുന്നവരുടെ പേരിൽ പുതിയ കണക്ഷനുകൾ അനുവദിക്കാതിരിക്കാനാണ് ടെലികോം ഓപ്പറേറ്റർമാർക്ക് നിർദേശം നൽകിയിരിക്കുന്നത്.

നിലവിലെ നിയമപ്രകാരം ഇന്ത്യയിലെ ഭൂരിഭാഗം പ്രദേശങ്ങളിലും ഒരാൾക്ക് പരമാവധി 9 സിം കാർഡുകൾ വരെയാണ് കൈവശം വെക്കാൻ സാധിക്കുക. എന്നാൽ ജമ്മു കശ്മീർ, അസം, മറ്റ് വടക്കുകിഴക്കൻ സംസ്ഥാനങ്ങൾ എന്നിവിടങ്ങളിൽ ഈ പരിധി 6 സിം കാർഡുകളാണ്.

സിം കാർഡുകളുടെ എണ്ണത്തിന് പരിധി ഏർപ്പെടുത്തിയിട്ടുള്ളത് പുതിയ നിയമമല്ല. എന്നാൽ അനധികൃത കണക്ഷനുകളും സിം കാർഡുകളുടെ ദുരുപയോഗവും തടയുന്നതിനായി നിലവിലുള്ള വ്യവസ്ഥകൾ കൂടുതൽ കർശനമായി നടപ്പാക്കുകയാണ് ടെലികോം വകുപ്പ്.

വയനാട്ടിലെ വാർത്തകൾ തൽസമയം അറിയാൻ വാട്സ്ആപ്പ് ചാനലിൽ ജോയിൻ ചെയ്യു

ഇനി പുതിയ സിം കാർഡിനായി അപേക്ഷിക്കുമ്പോൾ ഉപഭോക്താവിന്റെ പേരിൽ നിലവിൽ എത്ര മൊബൈൽ കണക്ഷനുകളുണ്ടെന്ന് ടെലികോം കമ്പനികൾ പരിശോധിക്കും. ഇതിനായി ഡിജിറ്റൽ ഇന്റലിജൻസ് പ്ലാറ്റ്ഫോം (DIP) ഉൾപ്പെടെയുള്ള സംവിധാനങ്ങൾ ഉപയോഗിച്ചായിരിക്കും പരിശോധന.

അനുവദനീയമായ പരിധി ഇതിനകം മറികടന്നിട്ടുണ്ടെങ്കിൽ പുതിയ സിം കണക്ഷൻ ലഭിക്കുന്നതിൽ നിയന്ത്രണം നേരിടേണ്ടിവരും. സൈബർ തട്ടിപ്പുകൾ, വ്യാജ തിരിച്ചറിയൽ രേഖകളുടെ ഉപയോഗം, മൊബൈൽ കണക്ഷനുകളുടെ ദുരുപയോഗം തുടങ്ങിയവ തടയുന്നതിന്റെ ഭാഗമായാണ് നടപടി.

അതേസമയം, ഒരാളുടെ പേരിൽ രജിസ്റ്റർ ചെയ്തിട്ടുള്ള ഉപയോഗിക്കാത്തതോ ആവശ്യമില്ലാത്തതോ ആയ സിം കാർഡുകൾ ഉണ്ടെങ്കിൽ അവ പരിശോധിച്ച് ആവശ്യമായ കണക്ഷനുകൾ മാത്രം നിലനിർത്തുന്നത് ഉപഭോക്താക്കൾക്ക് ഗുണകരമായിരിക്കും.