മുഖ്യമന്ത്രിപദത്തെ ചൊല്ലി കോണ്‍ഗ്രസിനുള്ളിലെ നേതൃത്വ പോര് തുടരുന്നതിനിടെ, തെരഞ്ഞെടുക്കപ്പെട്ട കോണ്‍ഗ്രസ് എംഎല്‍എമാരുടെ ആദ്യ നിയമസഭാ കക്ഷിയോഗം ഇന്ന് തിരുവനന്തപുരത്ത് നടക്കും. കെപിസിസി ആസ്ഥാനമായ ഇന്ദിരാഭവനില്‍ ഹൈക്കമാന്‍ഡ് നിയോഗിച്ച എഐസിസി നിരീക്ഷകരുടെ സാന്നിധ്യത്തിലാണ് യോഗം ചേരുന്നത്.

മുഖ്യമന്ത്രി ആരാകണമെന്നതിനെ കുറിച്ചുള്ള എംഎല്‍എമാരുടെ അഭിപ്രായം എഴുതി വാങ്ങാനാണ് തീരുമാനം. എഐസിസി നിരീക്ഷകരായ Mukul Wasnikയും Ajay Makenയും ഓരോ എംഎല്‍എമാരെയും പ്രത്യേകം കണ്ടു അഭിപ്രായം തേടും. ഘടകകക്ഷി നേതാക്കളുമായും ഇവര്‍ ചര്‍ച്ച നടത്തും.

മുഖ്യമന്ത്രിപദത്തിനായുള്ള ചര്‍ച്ചയില്‍ K. C. Venugopal, Ramesh Chennithala, V. D. Satheesan എന്നിവരുടെ പേരുകളാണ് പ്രധാനമായി ഉയര്‍ന്നുവരുന്നത്. കൂടുതല്‍ എംഎല്‍എമാരുടെ പിന്തുണ തനിക്കുണ്ടെന്നാണ് കെ. സി. വേണുഗോപാലിന്റെ അവകാശവാദം. സീനിയോറിറ്റിയാണ് രമേശ് ചെന്നിത്തലയുടെ പ്രധാന ശക്തിയെന്ന് വിലയിരുത്തപ്പെടുന്നു. പ്രവര്‍ത്തകരുടേയും പൊതുജനങ്ങളുടേയും പിന്തുണ തനിക്കൊപ്പമാണെന്നാണ് വി. ഡി. സതീശന്‍ കരുതുന്നത്.

യോഗത്തിന് ശേഷം എഐസിസി നിരീക്ഷകര്‍ ഇന്ന് തന്നെ ഡല്‍ഹിയിലേക്ക് മടങ്ങും. തുടര്‍ന്ന് കേരളത്തിലെ മുതിര്‍ന്ന നേതാക്കളെ ഡല്‍ഹിയിലേക്ക് വിളിപ്പിച്ച് കൂടുതല്‍ ചര്‍ച്ചകള്‍ നടത്താനാണ് സാധ്യത. നിരീക്ഷകര്‍ സമര്‍പ്പിക്കുന്ന റിപ്പോര്‍ട്ടിന്റെ അടിസ്ഥാനത്തില്‍ അടുത്ത രണ്ടു ദിവസത്തിനുള്ളില്‍ ഹൈക്കമാന്‍ഡ് അന്തിമ തീരുമാനം പ്രഖ്യാപിക്കുമെന്നാണ് സൂചന.