കോട്ടയം: കോട്ടയം മെഡിക്കൽ കോളജിൽ ചികിത്സയ്ക്കിടെ ഗുരുതര വീഴ്ച സംഭവിച്ചതായി പരാതി. ഒരു വയസുള്ള കുഞ്ഞിന്റെ ശരീരത്തിൽ നിന്ന് ശസ്ത്രക്രിയയ്ക്കിടെ സൂചി കണ്ടെത്തിയതായി മാതാപിതാക്കൾ ആരോപിച്ചു. പ്രസവത്തിന് പിന്നാലെ ലഭിച്ച ചികിത്സയ്ക്കിടെയാണ് കുഞ്ഞിന്റെ ശരീരത്തിൽ സൂചി കുടുങ്ങിയതെന്നാണ് കുടുംബത്തിന്റെ ആരോപണം. ഏകദേശം ഒരു വർഷത്തോളം കുഞ്ഞ് വേദന അനുഭവിച്ചിരുന്നതായും മാതാപിതാക്കൾ പറഞ്ഞു.

കഴിഞ്ഞ വർഷം ജൂൺ മാസത്തിലാണ് കുഞ്ഞിന്റെ പ്രസവം നടന്നത്. പ്രസവത്തിന് പിന്നാലെ പനിയും മഞ്ഞപ്പും ഉൾപ്പെടെയുള്ള ആരോഗ്യപ്രശ്നങ്ങൾ ഉണ്ടായതിനെ തുടർന്ന് കുഞ്ഞിനെ കോട്ടയം മെഡിക്കൽ കോളജിലെ നിയോനാറ്റൽ ഇൻറൻസീവ് കെയർ യൂണിറ്റിൽ (NICU) പ്രവേശിപ്പിച്ചിരുന്നു. ഇവിടെ ചികിത്സ ലഭിച്ചതിന് ശേഷമാണ് കുഞ്ഞിന്റെ ശരീരത്തിൽ തടിപ്പും മറ്റ് അസ്വാഭാവികതകളും ശ്രദ്ധയിൽപ്പെട്ടതെന്നാണ് മാതാപിതാക്കളുടെ വിശദീകരണം.

കുഞ്ഞിന് കടുത്ത വേദനയുണ്ടെന്ന് വീട്ടുകാർക്ക് പിന്നീട് മനസിലായെങ്കിലും വേദനയുടെ യഥാർഥ കാരണം കണ്ടെത്താൻ ഏറെ സമയമെടുത്തു. ശരീരത്തിലെ തടിപ്പിനെക്കുറിച്ച് കോട്ടയം മെഡിക്കൽ കോളജിൽ അറിയിച്ചിരുന്നെങ്കിലും നടത്തിയ സ്കാനിങ്ങിൽ പ്രശ്നങ്ങളൊന്നും കണ്ടെത്താനായില്ലെന്ന് പറഞ്ഞ് കുഞ്ഞിനെ തിരിച്ചയച്ചതായും കുടുംബം ആരോപിച്ചു.

എന്നാൽ പിന്നീട് നടത്തിയ പരിശോധനയിലാണ് തങ്ങൾ സംശയിച്ചിരുന്ന ഭാഗത്ത് സ്കാനിങ് നടത്തിയിരുന്നില്ലെന്ന് മനസിലായതെന്നും മാതാപിതാക്കൾ പറഞ്ഞു. കഴിഞ്ഞ ദിവസം കുഞ്ഞിന്റെ ശരീരത്തിൽ വീണ്ടും വലിയ തോതിൽ തടിപ്പ് കാണപ്പെട്ടതിനെ തുടർന്ന് കോഴിക്കോട് മെഡിക്കൽ കോളജിൽ എത്തിക്കുകയായിരുന്നു.

വയനാട്ടിലെ വാർത്തകൾ തൽസമയം അറിയാൻ വാട്സ്ആപ്പ് ചാനലിൽ ജോയിൻ ചെയ്യു

തുടർന്ന് നടത്തിയ പരിശോധനയിലാണ് ശരീരത്തിനുള്ളിൽ സൂചി കണ്ടെത്തിയത്. കോഴിക്കോട് മെഡിക്കൽ കോളജിൽ നടത്തിയ ശസ്ത്രക്രിയയിലൂടെ സൂചി പുറത്തെടുത്തു. സംഭവത്തിൽ കോട്ടയം മെഡിക്കൽ കോളജ് ഡെപ്യൂട്ടി സൂപ്രണ്ടിന്റെ നേതൃത്വത്തിൽ അന്വേഷണം ആരംഭിച്ചിട്ടുണ്ട്.

ചികിത്സയ്ക്കിടെ സംഭവിച്ച വീഴ്ചയാണോ കുഞ്ഞിന്റെ ശരീരത്തിൽ സൂചി കുടുങ്ങാൻ കാരണമായതെന്നും, സംഭവത്തിൽ ആരുടെയെങ്കിലും ഭാഗത്ത് വീഴ്ചയുണ്ടായിട്ടുണ്ടോ എന്നതുമാണ് അന്വേഷണത്തിലൂടെ വ്യക്തമാകുക. സംഭവത്തിൽ വിശദമായ പരിശോധന തുടരുകയാണ്.